Hi，各位同學，
你地好。我個名叫JMM，廣州出世，13歲就來咗美國，到而家已經喺美國踎咗二十幾年，係個三張幾嘅阿叔。不過，我唔多搭巴士，所以唔係巴士阿叔。封信都會幾長。各位同學可以去攞杯嘢飲，飲啖茶，食個鮑，慢慢睇。
我細個嗰陣，係睇無線嘅430穿梭機、小叮噹大嘅。到咗而家都仲可以唱番幾句“烏卒卒，佢好似一隻黑蟋蟀，烏卒卒”，又或者，“小叮噹係機械貓仔，唔識抓老鼠，唔識抓鬼，外貌像懵懵閉閉，永遠有新的光輝，仁慈善心英勇正直無人能代替”。細個嗰陣，我爸爸係做生意嘅，喺香港有唔少朋友，時不時會落香港玩，我喺美國讀中學嗰陣，每年暑假亦都會途經香港，喺香港我爸爸嘅好朋友嗰度住番一兩個禮拜。所以，我由細個到而家，都好中意香港，可以話係，愛香港。
嗰陣嘅中國，如果要經商，就要見官。耳濡目染，我對中國嘅政治同埋北京高層嘅唸法多少有D認識。來咗美國之後，大學嘅時候，美國民主黨全國大會係洛杉磯呢道開，然後有好多學生去示威抗議，我有唔少同學去咗。我冇去示威抗議，但係有揸車去救人，親眼睇到個靚女friend俾催淚彈搞到成面眼水鼻涕加口水，亦都親眼睇過有人襲警。所以，我對示威抗議嘅時候，人群同警方嘅互動亦都多少有D認識。后尾呢幾年，我又幫美國共和黨嘅前任勞工部長趙小蘭，同埋民主黨嘅前任勞工部長 Hilda Solis 搞過競選募款活動。而且，而家參加緊一個美國聯邦情報總署搞嘅， 叫做 The Good Judgment Project 嘅 crowd intelligence project 。對於一個成熟民主政體嘅政治同埋危機處理，多少亦都有D認識。
曬咗咁耐 quali ，就係想各位同學可以認真地聽下同埋唸下下邊我要講嘅說話。主要係關於 conflict resolution -- 如何解決紛爭同衝突。
我亦都曾經係你地而家呢個年紀。我亦都曾經熱血過。但係，鬧，吵，甚至打，係解決唔到問題嘅。
由細小處著眼，大家都做過中國人嘅仔女，俾老豆或者阿媽鬧或者打嘅經驗相信都會有。各位同學，以你嘅經驗，當你俾老竇鬧緊嘅時候，佢講嘅嘢你係全盤接受，定係左耳入右耳出？將心比心，當你以鬧佢嘅態度去同梁生講嘢嘅時候，你覺得佢會不會好容易地接受？
由大處著眼，以舊年香港碼頭工人罷工示威為例，40日之後，最尾係資方話“怕咗你地啦，你要加幾多就加幾多啦。”定係雙方坐落來傾，先至搵到折中方案，解決加薪問題？
當年，巴士阿叔講過“你有壓力，我亦都有壓力”。其實，發爛渣，又或者好似春田花花幼稚園教嘅訓低詐死，耍賴係永遠都解決唔到問題o架。大家坐低，心平氣和咁傾下至得。
阿叔我俾你地考慮嘅建議係：“佔中”又好，“泛民”又好，“學聯”同埋其他“學生運動”又好，用一個禮拜，選出三個代表；然後再用幾日，詳細列出要求，然後10月13號同梁生坐低傾。喺呢段時間內，維持現狀，status quo 。亦即係港府承諾唔動用藍帽子清場，承諾同示威者代表對話。示威者亦要承諾唔再嘗試衝入政府總部，盡量約束同仁，而且當同仁之中有人試圖使用暴力或者損毀公物嘅時候，出聲，出手制止佢地。唔好話“唔會”先。示威嘅時候，一大群人入邊，實會有幾個攪屎棍。2000 年LA DNC 過陣，阿叔我就親眼睇過。
我亦會俾梁生相同嘅建議：等下，冷靜D，坐低傾。
一人退一步，先至有得傾。大家一齊硬頸，邊個都唔退讓，到咗最尾，就係兩班人一齊叫住“愛香港” 嘅口號，一齊害死香港。
我唔係話各位同學唔啱。唔係話大家表達自己嘅意見，要民主，要自由唔啱。今次示威，當然細節有值得檢討嘅地方，但係，到而家為止，包括示威者同警方在內，總體其實都算克制。我可以好負責任地講：我地美國通常激好多；大陸就仲激D；如果去到中東，哇！激到爆！真係炸彈爆炸嘅爆 ... 咁激有冇益？
民主，自由，都係崇高嘅理想。但係，想達到目的，可以有好多手段。有D係會傷害到自己亦都會傷害到他人嘅。“你應唔應承我？！唔應承我我就跳落去死俾你睇”係最差嘅手段之一。
言論自由，唔係話：我講嘅啱曬，你講嘅錯曬；你唔完全認同我講嘅嘢就係獨裁，反民主，邪惡共產。
獨立思考，唔係話：先生講一句，你就駁一句；亦都唔係話，政府做咩都要反對，逢政必反。
我地每一個人，都係獨立嘅個體，都有自己嘅意見。意見唔同，係好正常嘅事。如果連靜低，聽下對方嘅意見都做唔到，又點搞民主？
講真，反對係最容易嘅，開下口就得了。前幾年，港府有財政盈餘，於是乎派錢。我有唔少有香港身份證的朋友都由美國飛番去攞。市民多數都覺得係好事。但係，泛民就有議員話，派錢係“懶政”。於是乎，港府之後就唔派錢了。派錢，係懶政；如果收收埋埋，可以話佢係斂財；如果攞來搞公共建設，又可以話浪費公帑；凈係派俾窮人，都仲可以話分發過程唔公平，新移民交稅少應該攞少D。咁點啊？
而家搵食艱難係事實，大學畢業買唔起樓，貧富懸殊越來越嚴重，亦都係事實，但係呢D主要係經濟因素造成嘅，而唔係政治因素。我遲少少會講下點解。97之後，港府做得好唔好。2014年嘅香港係黑暗，沉淪，冇自由；定係“還好啦”，“同97之前差唔多啦”。呢樣嘢，希望大家可以兼聽則明，亦要睇下國際上有公信力，中立嘅組織同機構點講。下邊幾個機構嘅資料，大家喺網上可以好容易搵到，歡迎獨立求證。
我地美國有個好有名嘅智庫，叫做 The Heritage Foundation 。佢地由1995年開始，每年都會出一個全球經濟自由度報告，Index of Economic Freedom。由95年到今年，2014年，香港都係攞第一。你冇睇錯，香港，經濟自由度排全世界第一。呢個排名，星加坡排第二，美國12，台灣17，中國大陸137。係唔係公正，相信各位同學心中有數。
第一啊！全世界第一啊！！作為香港人，你應該足以感覺到自豪。
Transparency International 係德國一個好有名嘅國際機構。佢地每年會出一個貪污指數報告，Corruption Perception Index。今年未出，不過2013年，論廉潔程度，香港排第15，星加坡排第5，美国排18，台湾排36，大陆排到80。以級數計，香港仍然贏台灣兩班，同美國同一級數，撇開大陸好多班。
The World Economic Forum，全球經濟論壇，每年會出一個全球競爭力報告，Global Competitiveness Report，2014-15年度，香港排第7；星加坡排第二，美國排第3，台灣14，大陸28。
俾出呢三個冧巴，想講嘅係：香港嘅大環境其實唔差，亦冇差過97之前。
搵食艱難，大學畢業買唔起樓，貧富懸殊越來越嚴重，這三個問題其實全世界都有，我地美國亦有。如果冇，當年“佔領華爾街”，Occupy Wall Street 就唔會喺我地美國開始啦。下邊要講嘅，多少同遊戲規則有關，可能需要唸下。大家不妨去下洗手間，refill 下飲品，攞多個鮑。咦，鮑定包啊？是但啦 ...
第一個問題，搵食艱難，同全球化以及產業結構調整有關。大家仲記唔記得，麥兜媽咪嗰首“車衣女工之歌”。曾經，六零年代，七零年代嗰班香港人係好勤力，好搏o架。佢地可以一個禮拜做足7日，日日12個鐘，企喺道做。嗰陣嘅香港企業，靠嘅係價格優勢，係如假包換嘅血汗工廠。但係時至今時今日，我地這代人，又有幾個做得到？唔好講香港，就算大陸，這幾年都漸漸少咗好多咁嘅血汗工廠啦。香港經濟整體由輕工業調整到金融業、服務業、運輸業、旅遊業為主，其實算係成功。但係，就引出第二個問題 ...
我大學畢業買唔起樓啊，頂佢個肺！這個問題，同第一個問題有關聯，亦有其獨立性。唔知大家記唔記得，曾幾何時，香港係得港大一間大學嘅，然後，又有咗城大同科大。中國人父母，多數中意細路讀多D書。大學生多咗，但係，服務業、運輸業、旅遊業其實唔需要咁多大學生，咁就導致人工低啦。Econ 101, supply and demand 啊，同學。包括董伯伯，煲鈦曾同而家嘅梁生，港府唔係冇做個努力。當然，有冇成效有待探討。另外一方面，樓價又確實升咗好多。而樓價問題，同第三個問題，貧富懸殊，又有關聯 ...
貧富懸殊，係一個所有資本主義經濟體都要面對嘅問題，國際上通常用堅尼係數表示。大家可以去查下堅尼係數，Gini coefficient ，即使美國亦好高。一個好簡單嘅例子：你同隔離班小明成績都好好，兩個人都立志畢業一年后就賺一百萬。你一個仙本錢都沒有，小明爹地俾咗佢一千萬做本。你嗰一百萬係想攞來做首期；小明係為咗證明自己。你覺得一年后，邊個人更加有可能達成願望？當你打緊工嘅時候，小明可能已經用嗰一千萬炒緊樓。一年后，樓價當然升咗。就算你好勤力，亦好好彩，一年后真系賺到一百萬，可能已經唔夠首期。資本主義，意思即係資本可以帶俾你更多資本，財富可以帶俾你更多財富，錢係可以生錢嘅。所以會富者愈富，貧者愈貧。這個問題，亦叫做“馬太效應”。解決之道，唔係冇，政府干預，收交易稅同遺產稅來平衡。但係政府如果咁做，亦會損害市場自由度。我地美國遺產稅好高，所以俾人排咗去12位。世事，好多時候係冇得兩全其美o架。
十幾年都冇打咁多中文，打完自己都嚇親。最尾想講嘅係：阿叔我唔係想叫你做咩，或者唔好做咩。阿叔凈係提供資訊同埋建議俾你，等你可以做到更好嘅決定。
返學又好，落club玩又好，相信大家都睇過人地吵交，打交。有人吵同打交嘅時候，旁觀者之中，有人會睇，唔出聲；有人會嘗試勸，話“一人少句，唔好郁手，冷靜下”；仲有一啲人，會大聲叫：“刮佢啊！打佢啊！哇！佢攞凳啊！俾把西瓜刀你，劈死佢！”
阿叔我而家做緊勸人嗰個。我希望各位同學冷靜之後，可以由頭到尾唸下成件事。既然好似個成年人咁去示威，就要擔當起成年人嘅責任。而檢討自己，肯認錯，係成年嘅標誌之一。對於梁生來講係咁，你地亦係。
今日嘅香港，仍然係東方之珠。明天的香港，依然可以非常美麗。
愛香港，就唔好唱衰她。
愛香港，就唔好傷害她。
愛香港，就唔好玩殘她。
天佑香港！
J. M. M.
ps. 好長啊，救命，聽日先寫俾家長們同埋梁生嗰兩封信，take care
你地好。我個名叫JMM，廣州出世，13歲就來咗美國，到而家已經喺美國踎咗二十幾年，係個三張幾嘅阿叔。不過，我唔多搭巴士，所以唔係巴士阿叔。封信都會幾長。各位同學可以去攞杯嘢飲，飲啖茶，食個鮑，慢慢睇。
我細個嗰陣，係睇無線嘅430穿梭機、小叮噹大嘅。到咗而家都仲可以唱番幾句“烏卒卒，佢好似一隻黑蟋蟀，烏卒卒”，又或者，“小叮噹係機械貓仔，唔識抓老鼠，唔識抓鬼，外貌像懵懵閉閉，永遠有新的光輝，仁慈善心英勇正直無人能代替”。細個嗰陣，我爸爸係做生意嘅，喺香港有唔少朋友，時不時會落香港玩，我喺美國讀中學嗰陣，每年暑假亦都會途經香港，喺香港我爸爸嘅好朋友嗰度住番一兩個禮拜。所以，我由細個到而家，都好中意香港，可以話係，愛香港。
嗰陣嘅中國，如果要經商，就要見官。耳濡目染，我對中國嘅政治同埋北京高層嘅唸法多少有D認識。來咗美國之後，大學嘅時候，美國民主黨全國大會係洛杉磯呢道開，然後有好多學生去示威抗議，我有唔少同學去咗。我冇去示威抗議，但係有揸車去救人，親眼睇到個靚女friend俾催淚彈搞到成面眼水鼻涕加口水，亦都親眼睇過有人襲警。所以，我對示威抗議嘅時候，人群同警方嘅互動亦都多少有D認識。后尾呢幾年，我又幫美國共和黨嘅前任勞工部長趙小蘭，同埋民主黨嘅前任勞工部長 Hilda Solis 搞過競選募款活動。而且，而家參加緊一個美國聯邦情報總署搞嘅， 叫做 The Good Judgment Project 嘅 crowd intelligence project 。對於一個成熟民主政體嘅政治同埋危機處理，多少亦都有D認識。
曬咗咁耐 quali ，就係想各位同學可以認真地聽下同埋唸下下邊我要講嘅說話。主要係關於 conflict resolution -- 如何解決紛爭同衝突。
我亦都曾經係你地而家呢個年紀。我亦都曾經熱血過。但係，鬧，吵，甚至打，係解決唔到問題嘅。
由細小處著眼，大家都做過中國人嘅仔女，俾老豆或者阿媽鬧或者打嘅經驗相信都會有。各位同學，以你嘅經驗，當你俾老竇鬧緊嘅時候，佢講嘅嘢你係全盤接受，定係左耳入右耳出？將心比心，當你以鬧佢嘅態度去同梁生講嘢嘅時候，你覺得佢會不會好容易地接受？
由大處著眼，以舊年香港碼頭工人罷工示威為例，40日之後，最尾係資方話“怕咗你地啦，你要加幾多就加幾多啦。”定係雙方坐落來傾，先至搵到折中方案，解決加薪問題？
當年，巴士阿叔講過“你有壓力，我亦都有壓力”。其實，發爛渣，又或者好似春田花花幼稚園教嘅訓低詐死，耍賴係永遠都解決唔到問題o架。大家坐低，心平氣和咁傾下至得。
阿叔我俾你地考慮嘅建議係：“佔中”又好，“泛民”又好，“學聯”同埋其他“學生運動”又好，用一個禮拜，選出三個代表；然後再用幾日，詳細列出要求，然後10月13號同梁生坐低傾。喺呢段時間內，維持現狀，status quo 。亦即係港府承諾唔動用藍帽子清場，承諾同示威者代表對話。示威者亦要承諾唔再嘗試衝入政府總部，盡量約束同仁，而且當同仁之中有人試圖使用暴力或者損毀公物嘅時候，出聲，出手制止佢地。唔好話“唔會”先。示威嘅時候，一大群人入邊，實會有幾個攪屎棍。2000 年LA DNC 過陣，阿叔我就親眼睇過。
我亦會俾梁生相同嘅建議：等下，冷靜D，坐低傾。
一人退一步，先至有得傾。大家一齊硬頸，邊個都唔退讓，到咗最尾，就係兩班人一齊叫住“愛香港” 嘅口號，一齊害死香港。
我唔係話各位同學唔啱。唔係話大家表達自己嘅意見，要民主，要自由唔啱。今次示威，當然細節有值得檢討嘅地方，但係，到而家為止，包括示威者同警方在內，總體其實都算克制。我可以好負責任地講：我地美國通常激好多；大陸就仲激D；如果去到中東，哇！激到爆！真係炸彈爆炸嘅爆 ... 咁激有冇益？
民主，自由，都係崇高嘅理想。但係，想達到目的，可以有好多手段。有D係會傷害到自己亦都會傷害到他人嘅。“你應唔應承我？！唔應承我我就跳落去死俾你睇”係最差嘅手段之一。
言論自由，唔係話：我講嘅啱曬，你講嘅錯曬；你唔完全認同我講嘅嘢就係獨裁，反民主，邪惡共產。
獨立思考，唔係話：先生講一句，你就駁一句；亦都唔係話，政府做咩都要反對，逢政必反。
我地每一個人，都係獨立嘅個體，都有自己嘅意見。意見唔同，係好正常嘅事。如果連靜低，聽下對方嘅意見都做唔到，又點搞民主？
講真，反對係最容易嘅，開下口就得了。前幾年，港府有財政盈餘，於是乎派錢。我有唔少有香港身份證的朋友都由美國飛番去攞。市民多數都覺得係好事。但係，泛民就有議員話，派錢係“懶政”。於是乎，港府之後就唔派錢了。派錢，係懶政；如果收收埋埋，可以話佢係斂財；如果攞來搞公共建設，又可以話浪費公帑；凈係派俾窮人，都仲可以話分發過程唔公平，新移民交稅少應該攞少D。咁點啊？
而家搵食艱難係事實，大學畢業買唔起樓，貧富懸殊越來越嚴重，亦都係事實，但係呢D主要係經濟因素造成嘅，而唔係政治因素。我遲少少會講下點解。97之後，港府做得好唔好。2014年嘅香港係黑暗，沉淪，冇自由；定係“還好啦”，“同97之前差唔多啦”。呢樣嘢，希望大家可以兼聽則明，亦要睇下國際上有公信力，中立嘅組織同機構點講。下邊幾個機構嘅資料，大家喺網上可以好容易搵到，歡迎獨立求證。
我地美國有個好有名嘅智庫，叫做 The Heritage Foundation 。佢地由1995年開始，每年都會出一個全球經濟自由度報告，Index of Economic Freedom。由95年到今年，2014年，香港都係攞第一。你冇睇錯，香港，經濟自由度排全世界第一。呢個排名，星加坡排第二，美國12，台灣17，中國大陸137。係唔係公正，相信各位同學心中有數。
第一啊！全世界第一啊！！作為香港人，你應該足以感覺到自豪。
Transparency International 係德國一個好有名嘅國際機構。佢地每年會出一個貪污指數報告，Corruption Perception Index。今年未出，不過2013年，論廉潔程度，香港排第15，星加坡排第5，美国排18，台湾排36，大陆排到80。以級數計，香港仍然贏台灣兩班，同美國同一級數，撇開大陸好多班。
The World Economic Forum，全球經濟論壇，每年會出一個全球競爭力報告，Global Competitiveness Report，2014-15年度，香港排第7；星加坡排第二，美國排第3，台灣14，大陸28。
俾出呢三個冧巴，想講嘅係：香港嘅大環境其實唔差，亦冇差過97之前。
搵食艱難，大學畢業買唔起樓，貧富懸殊越來越嚴重，這三個問題其實全世界都有，我地美國亦有。如果冇，當年“佔領華爾街”，Occupy Wall Street 就唔會喺我地美國開始啦。下邊要講嘅，多少同遊戲規則有關，可能需要唸下。大家不妨去下洗手間，refill 下飲品，攞多個鮑。咦，鮑定包啊？是但啦 ...
第一個問題，搵食艱難，同全球化以及產業結構調整有關。大家仲記唔記得，麥兜媽咪嗰首“車衣女工之歌”。曾經，六零年代，七零年代嗰班香港人係好勤力，好搏o架。佢地可以一個禮拜做足7日，日日12個鐘，企喺道做。嗰陣嘅香港企業，靠嘅係價格優勢，係如假包換嘅血汗工廠。但係時至今時今日，我地這代人，又有幾個做得到？唔好講香港，就算大陸，這幾年都漸漸少咗好多咁嘅血汗工廠啦。香港經濟整體由輕工業調整到金融業、服務業、運輸業、旅遊業為主，其實算係成功。但係，就引出第二個問題 ...
我大學畢業買唔起樓啊，頂佢個肺！這個問題，同第一個問題有關聯，亦有其獨立性。唔知大家記唔記得，曾幾何時，香港係得港大一間大學嘅，然後，又有咗城大同科大。中國人父母，多數中意細路讀多D書。大學生多咗，但係，服務業、運輸業、旅遊業其實唔需要咁多大學生，咁就導致人工低啦。Econ 101, supply and demand 啊，同學。包括董伯伯，煲鈦曾同而家嘅梁生，港府唔係冇做個努力。當然，有冇成效有待探討。另外一方面，樓價又確實升咗好多。而樓價問題，同第三個問題，貧富懸殊，又有關聯 ...
貧富懸殊，係一個所有資本主義經濟體都要面對嘅問題，國際上通常用堅尼係數表示。大家可以去查下堅尼係數，Gini coefficient ，即使美國亦好高。一個好簡單嘅例子：你同隔離班小明成績都好好，兩個人都立志畢業一年后就賺一百萬。你一個仙本錢都沒有，小明爹地俾咗佢一千萬做本。你嗰一百萬係想攞來做首期；小明係為咗證明自己。你覺得一年后，邊個人更加有可能達成願望？當你打緊工嘅時候，小明可能已經用嗰一千萬炒緊樓。一年后，樓價當然升咗。就算你好勤力，亦好好彩，一年后真系賺到一百萬，可能已經唔夠首期。資本主義，意思即係資本可以帶俾你更多資本，財富可以帶俾你更多財富，錢係可以生錢嘅。所以會富者愈富，貧者愈貧。這個問題，亦叫做“馬太效應”。解決之道，唔係冇，政府干預，收交易稅同遺產稅來平衡。但係政府如果咁做，亦會損害市場自由度。我地美國遺產稅好高，所以俾人排咗去12位。世事，好多時候係冇得兩全其美o架。
十幾年都冇打咁多中文，打完自己都嚇親。最尾想講嘅係：阿叔我唔係想叫你做咩，或者唔好做咩。阿叔凈係提供資訊同埋建議俾你，等你可以做到更好嘅決定。
返學又好，落club玩又好，相信大家都睇過人地吵交，打交。有人吵同打交嘅時候，旁觀者之中，有人會睇，唔出聲；有人會嘗試勸，話“一人少句，唔好郁手，冷靜下”；仲有一啲人，會大聲叫：“刮佢啊！打佢啊！哇！佢攞凳啊！俾把西瓜刀你，劈死佢！”
阿叔我而家做緊勸人嗰個。我希望各位同學冷靜之後，可以由頭到尾唸下成件事。既然好似個成年人咁去示威，就要擔當起成年人嘅責任。而檢討自己，肯認錯，係成年嘅標誌之一。對於梁生來講係咁，你地亦係。
今日嘅香港，仍然係東方之珠。明天的香港，依然可以非常美麗。
愛香港，就唔好唱衰她。
愛香港，就唔好傷害她。
愛香港，就唔好玩殘她。
天佑香港！
J. M. M.
ps. 好長啊，救命，聽日先寫俾家長們同埋梁生嗰兩封信，take care
